Chor viril Breil
Il chor viril Breil
Ils 20 da december 1901 ein las empremas statutas dil Chor viril Breil vegnidas screttas e prelegidas al chor. Deplorablamein ein d’anflar neginas notizias davart igl act da fundaziun. Aschia eis ei buca pusseivel d’eruir, schebein il chor che haveba gia existiu ei mo vegnius reactivaus e provedius cun statutas ni sch’igl ei veramein vegniu fundau ina nova uniun. Segir ei denton ch’il plevon Flurin Camathias da Laax ed il scolast Mathias Friberg da Danis ein stai ils iniziants dalla fundaziun dalla scocietad da musica e dil chor viril.
Igl onn 1905 han il chor viril e la societad da musica cumprau da cuminonza ina bandiera cun l’inspiraziun „Harmonia Breil“ dad ina vart e „Pro Deo et Patria“ da l’autra vart. Ulteriuras bandieras ein vegnidas cumpradas 1947 e 1980.
Igl emprem grond pensum ch’il chor viril ha giu d’ademplir ei stau d’organisar la Fiasta da cant districtuala la fin d’avrel digl onn 1913.
Il pensum central ei denton stau il cant sacral en quter vuschs. La cronica dall’uniun relata denton era da fiastas polularas e giubileums el vitg e viadis da concert ella Bassa.
Dapi igl onn 1991 seconcentrescha il chor sil cant profan, promovend ton la canzun populara sco artistica.
El decuors da sia historia ha il chor viril participau a treis fiastas federalas, endisch cantunalas, 28 districtualas e sis cecilianas.
Igl onn 2001 ha il chor viril festivau sia fiasta centenara ed ediu ina cronica ch’ei vegnida cumpilada da Michael Friberg. Tenor quella ei il pli vegl document che relata d’ina cultura cantica a Breil d’anflar egl urbari vegl dalla pleiv da Breil che datescha digl onn 1804.
Aposta per il giubileum da 100 onns ha il Chor viril Breil era realisau il disc cumpact cul tetel „Auras e lunas“. Il portatun cumpeglia ina rischlada da 25 cumposiziuns che documenteschan igl operar musical dil chor.